جريدة هرم مصر حقيقه بدات
خالد كامل..يكتب..ف الصميم
“””””””””””
طول عمرنا اللي عدي وإحنا مانقدرش ننسي في يوم من الايام .. ريحة اي حاجة من روايح زمان واتحدي ….مين فينا يقدر ينسي ريحة المحشي في الشتا زمان ولا ريحة طشة الملوخية وهي ماليا البيت ولاريحة البطاطس المحمرة والكفتة بالرز واللي كلنا كنا بنسرقها بعد ماتطلع من الزيت وقبل ماتتحط في الطبيخ ولا ريحة الجير اللي علي حيطان شقة جدك ولاريحة الجوافة وانت رايح الدرس وقت العصرية ولا ريحة الخيار في التلاجه ولاريحة الشاي وهو بيفور علي وابور الجاز ولاريحة دخان لمبة الجاز ولاريحة الجو بعد المطرة وانت راجع من اللعب ولبسك كله مبلول ولا ريحة الكراريس والكشاكيل الجديدة اللي بتستلمها في أول يوم بالمدرسة ولاريحة النجيله وانت بتلعب كورة زمااان في الجنينة ولاريحة فول السحور من ايد ابوك ولاريحة سندوتشات الجبنة بالخيار في الفسحة ولا ريحة المفتقة ولا ريحة البيض بالبسطرمة ولا ريحة السمنة بعد ما تسيحها الست والدتك وتاكل ساندويتش المورته من ايديها ولا ريحة العيش الفينو السخن وانت مستنيه من الفرن الصبح وجسمك متكتك من البرد ولاريحة رمضان وفطوره وبلحه وخشافه وطبيخه وكله كوم وريحة دفا العيله كوم تاني خالص…. واحنا كلنا قاعدين جمب بعض علي الارض حوالين طبلية الفطار وسحور رمضان والفول والزبادي وكمان لايمكن ننسي ابدا ريحة البارود في بومب العيد…ابدا ولا عمرنا في يوم هاننسي كل الروايح الحلوة ديه كلها علي بعضها علشان هي دخلت روحنا من جوه وسكنتها بل وأحتلتها أيضا
فقد كانت بحق روايح الزمن الجميل .
*اللهم صبرنا علي فراق من احببناهم وعشقناهم خلال رحلة عمرنا الذي مر بنا سريعا.
اللهم بارك واحفظ اعمار وصحة وابدان وعافية اهالينا من كان منهم علي قيد الحياة ولاترنا فيهم اي مكروه أو سوء أو ضر .
*امين..امين .امين..يارب العالمين.
